Mark 15

Yisasina avaleꞋya Pailatite umainae.

1Kola alino halegeꞋya mukiꞋa mono note kava vayaꞋene Yuta vayatamaene kahegi kema havilinaya anagaꞋene kanisole vayaꞋene Yisasina haesageno falisia kea huge havige huteꞋya Yisasina nofi kiteteꞋya ala kamani kava kanole, Pailatite* avaleꞋya ayapi motenae. 2Motageno PailatiꞋa Yisasifena mage huno hie “Kagaya Yuta veaꞋmogami Sauve kano mainano?” huno havigegeno YisasiꞋa mage hie “KagaikaꞋa ani kea hai nehane.” huno hie. 3HigeꞋya mono note kava vayaꞋmoꞋya kasagoꞋya kea “MaꞋa kefo kava humainane.” huꞋya hutenae. 4HuneꞋatageno PailatiꞋa nagoꞋene mage huno hie “Havio mukiꞋa kefo yama nehana yana ali falote nehagi kagaya kenonaꞋamia naꞋa higeka nohane?” huno hie. 5Hianagi YisasiꞋa kenonaꞋa nagola osi ke kanoꞋa ohigeno Pailatina amaꞋyo aimaine.

PailatiꞋa Yisasife “Yafaga yosale nili hetama asaigeno falino.” huno hie.

6KafuꞋahe kafuꞋahe Anumaya KotiꞋa amaugafama aligatimainea kanahe amakesa haviꞋya imua negiyanagino PailatiꞋa mukiꞋa ani imu kisaya kanafina nagoke nofi hutegeno nemaiya kanoa vayaꞋyagamoꞋya haesaga huꞋya “Agaya esie.” huꞋya haya kanohe nofipitila “Hai haꞋno hanagi vuo.” huno huneꞋatea kanae. 7Ani kanafina nago kanomo agia PalapasiꞋe kamani vayaꞋene tuma nehaya vayaꞋene maineno tuma haya kanafina vayala tavata nehamaeyaya vayaꞋene mainegeꞋya kina nopi avaleꞋya hutenayane. 8HutenayanagiꞋya vayaꞋyagamoꞋya Pailatife mage huꞋya me hae “MukiꞋa imuma kina kanafima nehana kavala hulato.” huꞋya hae. 9Hageno PailatiꞋa mage huno hamavige “Nagaya Yisasifena Yuta veate Sauve kanomofe ‘Hai haꞋno hanagi vuo.’ huꞋna hisugetama musena hugahao?” huno hamavige. 10HigeꞋya mono note kava vayaꞋmoꞋya ma amakesa haviye “MukiꞋa veala Yisasi kegeꞋya nehaviꞋya tagai kea nohaviye.” huteꞋya ani yafe Yisasifena amaipamoꞋa haviya huteteꞋya Pailatite avaleꞋya ageno PailatiꞋa ani yafe agesa nehavino humaine. 11Havianagi mono note kava vayaꞋmoꞋya mukiꞋa vayaꞋmogami amaipa moyeꞋya mage huꞋya hamapaiye “Mage hutama hiho ‘Palapasina atalesanageno afaꞋa esie.’ hutama hiho.” huꞋya hae. 12Hageno PailatiꞋa vayaꞋyagahena mage huno hamavige “AniꞋa hisuana ma kanomofe tamakaya Yuta vayate Sauve kano maine hutama nehaya kanomofena naꞋa hutesue?” huno hamavige. 13HamavigegeꞋya mukiꞋa vayaꞋmoꞋya ala kefiti mage huꞋya hae “Yafaga yosale nili hetama asaigeno falino.” huꞋya hae. 14Hageno PailatiꞋa mage huno hamavige “NaꞋa higetama na kea nehae? HanaꞋa augafa kefo kava humaine?” huno hianagi amakaya eteꞋya aliꞋya alapi ataleꞋya ala kefiti mage huꞋya hae “Yafaga yosale nili hetama asaigeno falino.” huꞋya hae. 15Hageno PailatiꞋa mukiꞋa vayaꞋmoꞋya muse hisaya kava hugahue huno Palapasina nofipiti avaleno neꞋataleno Yisasina agata aisifa kaꞋyoteti haifu amiteno Yisasina ati vaya amayapi ateteno “Yafaga yosale nili hetama asaigeno falino.” huno hie.

Ati vayaꞋmoꞋya Yisasina huꞋya akaya atenae.

16Ati vayaꞋmoꞋya Yisasina avaleꞋya ala kava kanomo no haupalega umaineꞋya mukiꞋa amakaiꞋene nemaiya ati vayafe ke hageꞋya emainae. 17EmaineꞋya Yisasina akaya ategahe “Ala kano mainane.” huꞋya hisaya yafe ayaꞋaya haesa kena aliꞋya faiteteꞋya avetaꞋnafaꞋage nofi aliꞋya mo aigalaki me aigalaki huꞋya tumano kula talo huꞋya Yisasina anute vaitenae. 18VaiteteꞋya aepa heꞋya huhaviya hutegahena mage huꞋya hae “Felugae. Yuta vayaꞋmogami sauve kanomogae.” huꞋya akaya atae. 19NeꞋateꞋya anute kaꞋyoteti nagoꞋene nagoꞋene huꞋya aikoneliꞋya augafale amavetuꞋna heneꞋateꞋya amaleꞋya ayeꞋya mopale maineꞋya “Ala kano mainane” huꞋya ayevataga vatago humainae. 20Kigi huneꞋateꞋya haesa kena hateneꞋataleteꞋya agaiꞋa kena faiteteꞋya yafaga yosale nili hegahe avaleꞋya umainae.

Yisasina yafaga yosale nili heꞋya asaimainae.

21Kategama vayana SaimoniꞋene fotu humainae. Ani kanoa Sailini kumate kanoe. AlekasataꞋene Lufasiganiene neꞋanafaꞋe. Ani SaimoniꞋa hoyafinagati kate eneꞋvigeꞋya ati vayaꞋmoꞋya tokiyaꞋage ke huꞋya “Kaiyayeka yafaga yosa melika vuo.” huꞋya hageno molino umaine.

22Alino vigeꞋya Yisasina avaleꞋya vayaꞋamoꞋya Kologota kumate uvaꞋyi hae. Ani kumaꞋmo agimoꞋa tagaiti kefina anu ayamufa kumale huꞋya nehae. 23Ani ati vayaꞋmoꞋya “Haesunageno falisiana agata ai yafenagita agatama oꞋaisia tina amisunageno nesie.” huꞋyama hayana anima agata oꞋaisia timo agia mea. MeaꞋene nofi alagamo tiꞋene nagopi ali havigu huteꞋya aliꞋya amiyana YisasiꞋa ani tifena “AꞋao.” huno onene. 24OnegeꞋya yafaga yosale nili heꞋya asaimaleteꞋya kenaꞋa fako huꞋya aligahe musufa yama nehaya yokalo lageꞋya amakasaya vayaꞋmoꞋya alimainae.

25Natena naeni (9) kiloki yagemoꞋa anale hai vaꞋyi higeꞋya Yisasina yafaga yosalela nilia maleꞋya heteꞋya asaimainae. 26AsaiteꞋya “Ma kava higeta haune.” huꞋya kaemalenae “Mani kanoa Yuta veate ala Sauve kanoe.” huꞋya kaeꞋya malenae. 27KaemaleteꞋya YisasiꞋene tole kanolatana vaya nehamaeꞋana musufa yama nehaꞋa kanolatana nago kanoa Yisasina tamaga kaiyagaꞋa haeꞋya asaimaleꞋya nago kanoa haoga kaiyagaꞋa haeꞋya asaimaleꞋya humainae.

29HumalenageꞋya kateꞋma ute ete huꞋya agasaya vayaꞋmoꞋya amakeꞋya kaꞋyo aiꞋya “Kefo kano maine.” huꞋya kigi yokalofiti huhaviya huneꞋateꞋya mage huꞋya hae “Oho kagaya ‘Ala mono nona aliꞋna lagape aitaleteꞋna tagufa (3) kanafi eteꞋna kitalegahue.’ huka nehana kano mainane? 30Menia kagaya yafaga yosa neꞋataleka kagaikaꞋa elavika kaugafa aligatio.” huꞋya hae. 31HageꞋya mono note kava vayaꞋene kahegi kema havilinaya anagaꞋene amakaiꞋami vayaꞋmoꞋyaene aniꞋa huꞋya kamuge hatageꞋya vaineꞋateꞋya mohu mehu huꞋya huhaviya huneꞋateꞋya mage huꞋya hae “NagoꞋa vea amaugafa aligatimainegi naꞋa higeno agaiꞋa augafa ali nokatie. 32Kalaisiga Isaleli vayate Sauve kanoꞋamimoga yafaga yosa neꞋataleka elavigeta agamano. Agesunana kagaifena havita tagupi maleta tametitia hugahune.” huꞋya huhaviya huneꞋatageno agaiꞋenema yafaga yosaleꞋma asaimalaya musufa kanolatamoganienena aniꞋa huꞋana Yisasina huhaviya hutenaꞋe.

YisasiꞋa ago falie.

33YagemoꞋa euno amuꞋnokaꞋno higeno halemainea yamoꞋa haꞋno higeno mukiꞋa kotega tusiꞋa hanikino viaꞋamo une kanalega eteno ali halemaine. 34Une kanalega YisasiꞋa ala kefiti ke huno agaiꞋa kefiti mage huno hie “Eli Eli lema sapakatani.” huno hie. Tagaiti kefina mage huno hie “Anumaya KotiꞋnimogae, Anumaya KotiꞋnimogae naꞋa higeka nagaila nenatalane?” huno hie. 35HigeꞋya nagoꞋa anile hetimaiya veaꞋmoꞋya haviteꞋya mage huꞋya hae “Ilaiyafe ke nehigi haviho.” huꞋya hae. 36Hageno nago kanomoꞋa viaꞋamo hava koꞋyafa kana yana alino atuꞋage nofi alagamo tipi ayeteno alino viaꞋamo kupaga kaꞋyote maleno ani hava koꞋyafa kana yana kiteno “YisasiꞋa mayu mayu huno nesie.” huno neꞋamino mage huno hie “Agava maineta agesune IlaiyaꞋa yafaga yosaletila mevaleno elavisifi agegahune.” huno hie. 37Higeno YisasiꞋa ala kegefa huteno falimaine.

38FaligenoꞋa ala mono nopima ala kena ayaꞋaya kenagefama asaimalenaya kenamoꞋa YisasiꞋma falia kana kanoꞋale analeti aepa heno amuꞋnopiti hatata hulole hulavino mo talene. 39Ati vayate kava kanomoꞋa Yisasina aulega hetimaineno YisasiꞋa kema huteno falia yana ageteno mage huno hie “Tamage huno mani kanoa Anumaya Koti nafaꞋnelafa maine.” huno hie.

40NagoꞋa aꞋneyaga aluꞋale maineꞋya agemainae. NagoꞋamogami amakia, osi YemesiꞋene Yosefegani itaꞋanimoꞋa MaliaꞋe SalomiꞋagi Magatala kumate MaliaꞋagi huꞋya mainae. 41YisasiꞋa Kalilima mainea kanafina ani aꞋneyagamoꞋya akave vaiyatete nehuꞋya kavela kaeꞋya neꞋamiyane. MukiꞋa aꞋneyaga YisasiꞋene Yelusalemu tokaeꞋya umainaya aꞋneyaga aluꞋale hetiꞋya maineꞋya Yisasina agemainae.

Yisasina yafa kapi hevaitenae.

42Sapati yupahe haviꞋya talo tala hisaya kanagino yagemoꞋa lavi falegahe higeno YosefeꞋa Alimatia kumate kanoa Yuta kanisolefi nemaiya kanoa evaꞋyi hie. Ani kanoa Anumaya KotiꞋma kava yagaisia kanahe muse huno agava nehia kanogino kolia ohuno Pailatite viaꞋamo mage huno havige “Yisasina augafaꞋa aligahe nehue.” huno mo havige. 44Havigegeno PailatiꞋa “AupaꞋa ago falimainegeka nehano? AvoꞋnio namaꞋyo aiye.” huno agesa nehavino nagoꞋa ati vayate kava yagaimainea kanohe ke higeno egeno “YisasiꞋa ago falimaineo?” huno havige. 45Havigegeno ati vayate kava kanomoꞋa “E, ago falimaine.” huno higeno PailatiꞋa Yosefena mage huno hapaiye “Kanalelagi augafa afaꞋa moligane.” huno hie. 46Higeno YosefeꞋa viaꞋamo kaꞋyo muki ayaꞋaya kena molino viaꞋamo augafa yafaga yosaleti alino maleneno kenaleti augafalela aigalaki kalaki huno haꞋya kiteno alino viaꞋamo hefalegeꞋya kafimalenaya yafakapi Yisasina hevaiteteno avayaleꞋma aililesia yafana ayetufeno anile mo aililemalene. 47Magatala MaliaꞋene Yosefena itaꞋamoꞋa MaliaꞋene maineꞋana hevaitea yafa kaana agemainaꞋe.